不能同意更多！！！
護士，從來也是燃燒青春的行業。
每天不停的在忙不停的在奔跑，面對着生老病死，並不是輕鬆的事。
我們一直在努力，就只是為了能夠減輕病人痛苦、和看着病人情況好轉康復出院的那份滿足感 :)
越做越鍾意呢行 :)
護士呢行, 絕對係令你身心都疲憊不已的一個行業.
我可以咁講, 基本上做呢行有返咁上下日子, 都五勞七傷.
因為好多時, 我地做嘢果陣都好少理自己.
好似今朝咁, 做分流,
晨早八點, 你個枱已經有十幾張咭同一條打蛇餅的人龍響我眼前.
我不斷叫呢個叫嗰個,
到我得閒, 望一望個鐘, (事源係有同事在我背後叫我), 原來已經中午,
跟住我又係咁收, 不斷收,
到同事走過來話叫我去食飯, 已經兩點.
我一滴水同一個小便都無去過.
我覺得過多幾年腎虧都有之.
以前做病房一樣,
係咁收人係咁出院, 又有大把傷口, 巡完房的功課, 趕去做手術,
仲有大把日常工夫要做, 真係做到食啖飯的時間都無,
結果可能係一盒鮮奶, 一個麵包又一餐.
仲有, 有時急起上嚟, 尤其是急救,
每人梗可以發揮無窮小宇宙,
又拉又推個病人, 頂硬上.
之後喎, 梗係拉親手, 扭親腰.
雖然你話咁有職業安全,
但,有時急起上嚟, 真係顧唔到咁多.
除咗身體上, 心理上都係....
好似今日, 我就有機會上咗一節關於心理同精神科的課堂.
老師問我們:
「你覺得自己的工作, 健康嗎? 你喜歡嘛? 如果答案係唔係, 咁你仲會做呢行嘛?」
我諗咗一陣....
我份工作, 一啲都唔健康, 除咗頭先上面講過的, 工作忙到不得了之外.
我們工作的時間, 都會令自己失去了好多...
睡眠時間, 失去睡眠質素, 影響健康,
社交時間, 包括同朋友, 家人, 令自己的社交網絡縮小,
鬆弛時間, 去學習或者做自己的嚐好, 令自己好得到放鬆同減壓,
返到公司, 日日都受不少病人「問候」, 甚至動粗...
所以一啲都唔健康~
但係唔健康, 唔代表我唔鍾意.
你可以話, 我如果唔做, 的確係唔識做其他嘢, 所以我只可以繼續做.
但係其實我幾鍾意呢份工,
鍾意阿伯阿婆出院時, 特登走埋嚟, 好大力握住我的手, 講多謝我.
鍾意我幫手救過的病人可以成功出院.
鍾意怪獸家長呢頭仲鬧緊我無人性, 轉頭知道我係幫佢唔係害佢,
走過嚟同我講好多句對唔住, 然後多謝我, 之後好開心咁同佢個細路返屋企.
鍾意拉返人地個膊頭甩胶, 佢起初好懷疑我得唔得, 半信半疑,
之後佢係咁多謝我, 仲話我知唔痺又唔痛.
你可能話, 一句多謝之嘛. 佢可能轉過頭已經唔記得咗我.
但係我就係因為呢句多謝, 我願意繼續.
唔健康都願意做落去!!!
Search